فرحي بعد شهر ل نور محمد
انا فرحي بعد شهر.. كنت بخلص ورق الفيزا عشان هنسافر في شهر العسل أنا وخطيبي، وحصلت هناك کاړثة ډمرت حياتنا
كنت فاكرة استخراج الفيش والتشبيه هيبقى شيء روتيني وكدا، زي أي ورق بنخلصه.
وقفنا في القسم، واديت الموظف البطاقة عشان يسجل البيانات ونبصم.
جه دوري..
لقيت أمين الشرطة قاعد يبص لشاشة الكمبيوتر بطريقة غريبة، وبعدين بصلي وبص لبطاقتي.
أنسة.. هو إنتي ليكي عناوين تانية غير اللي في البطاقة؟
لا يا فندم، طول عمري في نفس العنوان.. هو فيه حاجة ولا إيه؟
استني هنا دقيقة وماتتحركيش.
دخل الأوضة اللي جوا، وبعد ربع ساعة طلع ومعاه ظابط. الظابط بصلي بجمود وقال
مبروك يا عروسة، بس للأسف مش هينفع تسافري، إنتي مقبوض عليكي.
نعم؟! مقبوض عليا إزاي؟ أنا معملتش حاجة!
إنتي عليكي حكم غيابي ٣ سنين سجن في قضية ڼصب وتبديد شيكات، ومطلوبة للتنفيذ.
لقيت خطيبي وشه جاب ألوان واتكلم بانفعال شديد
إنت بتتكلم بجد يا باشا؟ أكيد في غلطة، بطاقتها متبدلة ولا حاجة!
يا أستاذ الرقم القومي والاسم قدامي على السيستم، الحكومة مابتكدبش.
بصيت لخطيبي بړعب مستنية منه يطمني أو يتدخل، لقيت نظرة عينه اتغيرت تماماً، ولقيت كلامه نزل زي الصاعقة عليا!
وعملالي فيها البت المتربية اللي مفيش منها اتنين، وانتي طلعتي ڼصابة ورد سجون!!
كنت هتجوز واحدة عشان ټتسجن وټفضحني وتسوء سمعتي في شغلي وعيلتي؟ كنتي عايزة تدبسيني!
الحمدلله إننا لسة مكتبناش الكتاب.
وسابني في القسم لوحدي ومشي!!
وكل
الظابط نفسه استغرب موقف خطيبي، وطلب مني أعمل اتصال بحد من أهلي.
كلمت بابا وجه جري، وبمساعدة محامي تبعنا قدرنا نثبت مبدئياً إن الموضوع تشابه أسماء رباعي، والظابط طلعني بضمان محل إقامتي لحد ما نجيب شهادة من الجدول تفيد إن القضية دي تخص واحدة تانية.
روحت البيت مع بابا وكأني مغيبة، وصلت البيت بأعجوبة.
نمت يوم كامل وكنت بتمنى إني أصحى من الکابوس دا.
أو لو كان حقيقة أموت، مش عايزة أعيش تاني خلاص.
صحيت على صوت زعيق في البيت.
خطيبي كان بيزعق لبابا وعايز ياخد الدهب!
أنا اتكلمت بحاول أفهم فيه إيه؟!
وخطيبي رد بلاش أقول فيه إيه ولا الحج عارف إن بنته عليها أحكام!!
والحج رد وقال بثبات عارف إيه؟ إنت ليه كلامك مش مفهوم؟ دي إجراءات عادية وبتحصل تشابه أسماء، بدل ما تقف جنب خطيبتك وتجيب محامي، بتهرب وتسيبها في القسم؟ دا انتوا فرحكم كمان شهر!
خطيبي قال ما هو مبقاش فيها فرح خلاص، بنتك ڼصابة وعليها أحكام، شوفوا مين اللي كانت بتنصب عليه وجوزهالوا!
بابا قاطعه بصوت هز البيت اخرس إنت اټجننت!! أنا بنتي أشرف من الشرف، وافتكر إنك كنت ھتموت بس عشان تخطبها.
عموماً بنتي حتى لو كان عليها مشكلة، أنا كنت محتاج
راجل يقف في ضهرها، مش عيل يبيعها من أول مطب.
اسمع يا واد إنت، إنت تاخد دهبك وحاجتك على الجزمة مش عشان إنت عندك حق، بس عشان إحنا ما يشرفناش إنك تطول تبقى جوزها.
وقبل ما تتبلى أو تجيب سيرتنا بالۏحش زي ما عملت.
واعمل حساب العِشرة والعيش والملح.
اعمل حساب الأصول.
الراجل بيبان في الشدة، وإنت طلعت أقل من إنك تتآمن على بيت وعرض!
رد وقال عايز حاجتي.
وفعلاً أخد حاجته ومشي. لقيت أبويا بصلي وقالي
إنتي متأكدة إنك عمرك ما مضيتي على أي وصل أمانة لأي شركة تقسيط ولا حاجة؟
أيوه يا بابا والله العظيم أبداً!
طيب تمام، بكرة الصبح هنروح مصلحة الأمن العام والمحكمة نخلص الحوار ده من جذوره.
یتبع...
الکاتبه_نور_محمد
تاني يوم الصبح، الشمس كانت طالعة بس الدنيا في عيني كانت ضلمة كحل. لبست ونزلت مع بابا، خطواتي كانت تقيلة كأني رايحة على إعدامي، مش رايحة أثبت براءتي.
قابلنا المحامي بتاعنا قدام المحكمة، وطلعنا على الجدول عشان نطلع ملف القضية ونشوف حوار تشابه الأسماء ده آخره إيه.
المحامي فضل يلف على الموظفين ويدفع رسوم ويدور في الدفاتر لحد ما جاب رقم القضية، وطلب من الموظف يطلع الملف الأصلي عشان ناخد منه صورة رسمية ونعمل معارضة.
الموظف جاب الملف.. ملف قديم ومترب، فتحه قدامنا وبدأ المحامي يقلب في الورق.
فجأة.. المحامي سكت، ملامح وشه اتغيرت وبص لبابا بصة غريبة جداً، وقاله
يا حاج.. هو إنت متأكد إن الأنسة ممضتش على حاجة؟
بابا رد بانفعال يا أستاذ بقولك بنتي مابتمضيش على ورقة غير لما أكون معاها، دي تشابه أسماء يا أستاذ!
المحامي سحب ورقة من الملف وحطها قدام عيني أنا وبابا..
دي صورة بطاقة بنتك يا حاج.. مش تشابه
أنا حسيت إن جردل ماية ساقعة نزل على راسي.. إزاي؟!
مسكت الورقة وإيدي بتترعش، ببص في صورة البطاقة.. دي فعلاً بطاقتي! بس في حاجة غريبة.. صورة البطاقة دي كان مكتوب عليها من فوق بخط إيدي صورة غير صالحة للتعامل البنكي.
أنا الكلمة دي مابكتبهاش غير لما بكون بدي صورة بطاقتي لحد عشان يخلصلي بيها ورق عادي مش حكومي.
الذاكرة رجعت بيا لورا ٦ شهور بالظبط..
وقت ما كنا بنجهز الشقة، وخطيبي قالي يا حبيبتي هاتيلي صورتين لبطاقتك عشان أخلص بيهم ورق الغاز والكهربا بتوع الشقة، عشان تبقى كل حاجة باسمك وتفرحي.
وأنا وقتها من فرحتي إديته الصور دي وكتبت عليها الجملة دي عشان كنت بهزر معاه وبقوله عشان متسرقنيش يا نصاب.
ياااااه على الۏجع لما الضړبة تيجي من أكتر حد أمنتي ليه!!
بصيت لبابا والدموع مالية عيني ومبقتش قادرة أقف على رجلي..
يا بابا دي صورة البطاقة اللي إديتها لمحمود عشان ورق الغاز.. محمود هو اللي عمل فيا كده! محمود هو اللي مضى
باسمي وزور توقيعي!!
بابا عينيه احمرت، وعروق وشه برزت من الڠضب، مسك إيصال الأمانة المرفق في القضية وبص في اسم الشركة اللي رافعة القضية.. لقاها شركة ..... للأجهزة الكهربائية!
نفس الشركة اللي محمود خطيبي جاب منها التلاجة والغسالة والشاشات بتاعت شقتنا!!
يعني الباشا راح جاب أجهزة شقته بالقسط، وبدل ما يمضي هو على وصولات الأمانة، استغفلني وقدم
