خطف بالأتفاق بقلم إيمان شلبي
معلش ربع ساعه أن شاء الله وهكون عند حضرتك
تمام في انتظارك
نزلت لقيت عماد وقاسم واقفين زي الصبح مستنيين يوصلوني
رسمت نفس الابتسامه السخيفه علي وشي وانا بقرب منهم
معلش اتاخرت عليكم
عماد
ولا يهمك يا هانم احنا تحت امرك
ربنا يخليك ياعماد
خرج علبه من جيب الجاكيت بتاعه ومدلي أيده بابتسامه كلها احراج
اتفضلي
ايه ديه ياعماد
ديه هديه بسيطه كده جبتها لحضرتك ا أحم انا عارف انها مش قيمتك بس...
قاطعته وانا باخدها منه بابتسامه
تعرف أن دي اجمل هديه جاتلي
ابتسم بأحراج
ب بس انتي لسه مشوفتهاش ياهانم
مش مهم المهم انها منك واكيد هتكون جميله زيك
ربنا يخليكي يارب ويجبر بخاطرك ياست هانم
ويخليك يارب ...احم يلا
فتحلي الباب وركبت وبعدها ركب هو وقاسم اللي كان واقف ساكت وبيبصلي بنظرات غريبه لاول مره
وصلنا الحفله وفي الحقيقه كان احتفال عظيم بشكل يليق بيا
وقفت علي المنصه عشان اتكلم وعيني بتبص علي كل الوشوش وجواها حزن دفين
كان قدامي عدد كبير جدا من الناس اصحابي اهلي ناس تانيه المدير عازمهم قاسم وعماد
معظمهم كان باين عليهم الانبهار والفرحه والفخر أن بالرغم من صغر سني قدرت احقق مكاسب كتير جدا للشركه اللي شغاله فيها
وقتها اتنهدت بحزن وبدأت اتكلم واشكر الناس اللي حضروا واعبر عن مدي فرحتي بوجودهم الخ ...
لكن في النهايه انا مكنتش مبسوطه كنت حاسه ان في جبل واقف علي قلبي
وفجأة في وسط الاحتفال الانوار اتطفت ودخل ناس مسلحين جعلوا القاعه كلها تضطرب وانا من ضمنهم
فضلنا نصوت ونجري يمين وشمال والمسلحين بيضربوا نار عشوائي علي اي حد
وفجأة لقيت نفسي بتسحب
كنت لسه هصوت بس اللي بيسحبني حط ايده علي بوقي وهمس في ودني
هششش متخافيش ده انا
لفيت
ق قاسم
همس في ودني بهدوء
متخافيش
ا انت ا انت بتعمل ايه مع الناس دي و وليه بتعمل كده ا انت انت عايز تموتني ا انا معملتش حاجه والله الله يخليك ياقاسم الله يخليك متأذنيش انا معملتش حاجه وحشه انا عمري ما أذيت حد
بص في عيوني بشفقه من ورا الماسك اللي كان علي وشه
هشششش اهدي متخافيش مش هأذيكي بس انا مضطر اخطفك
برقت بصدمه
ت تخطفني
صدقيني ده لمصلحتك والله مش هأذيكي انا مش قتال قتله انا الرائد نادر السيوفي
ا انت بتقول ايه نادر مين ا اومال مين قاسم و....
ممكن تهدي وتسمعيني
اسمع ايه ا انت مجنون و....
جنا هانم صدقيني انا لو مخطفتكيش دلوقتي والخبر وصل للكل حياتك هتبقي في خطر ومش بعيد نسمع خبر موتك علي بكره بالكتير ارجوكي اسمعي الكلام وتعالي معايا من غير شوشره انا بعمل كده لمصلحتك
ا انت ا انت مش هتأذيني مش كده
صدقيني لا خليكي واثقه فيا وتعالي معايا
هزيت راسي ودموعي علي خدي
م ماشي م ماشي ياقاسم ا اقصد ياسياده الرائد نادر
ممكن افهم انت خاطفني ليه
قولتها لنادر وانا منفعله وقلبي بيدق برعب حقيقي وخاصه بعد ما اكتشفت أنه نادر مش قاسم
عن كميه الخوف والرعب والتشتت اللي كانت جوايا وكأني في فيلم اكشن !
اتنهد وهو بيركن عربيته علي جنب وبيبصلي بجمود
هحكيلك كل حاجه بس ارجوكي تسمعي للأخر
بلعت ريقي بصعوبه وانا بهز راسي بالموافقه بدون ما انطق حرف
للاسف يامدام جنا امجد جوز حضرتك شغال في أعمال غير شرعيه
جملته كانت بمثابه إناء من المايه البارده وقع فوق راسي بكل قسوه
جسمي اترعش وانا برد بصوت مهزوز
ا انت بتقول ايه ا امجد جوزي انا انت
سكتت مكنتش عارفه اقول ايه
اصل في الحقيقه الكلام اللي اتقال يطير برج من الدماغ
نادر بحزن
انا اسف بس انا عملت كده عشان احميكي
رديت بذهول
تحميني من مين من جوزي
لا من اللي شغالين مع جوزك
وهما عايزين مني ايه
ينتقموا من جوزك عن طريقك
رديت بعصبيه
هو جوزي عمل ايه فهمني
قولت لحضرتك ياجنا هانم جوزك شغال في أعمال غير شرعيه ادويه فاسده سلاح مخدرات وياعالم ايه تاني
فضلت اهز راسي بهستريه وانا بعيط بحرقه
لا لااا يانادر لا امجد ميعملش كده لا امجد كويس وعارف ربنا امجد بيصلي الفروض كلها مش بيسيب فرض واحد ل لا امجد بيساعد المحتاج وبيتبرع لكل الجمعيات الخيريه امجد برئ يا نادر ا اكيد انت فاهم الموضوع غلط ا...
امجد زعيم مافيا يا مدام جنا من قبل موت والده كان هو دراع والده اليمين لما والده توفي بقى هو الزعيم والكل بيعمله الف حساب دلوقتي ووجودك معاه اكبر خطر دلوقتي
خطر!!
للاسف امجد موت زعيم مافيا كبير اوي وأهله مستحلفين ينتقموا
رديت بخوف
وانا دخلي ايه بالموضوع
انك مراته وانتقامهم من امجد يتلخص في خطفك وموتك
م م موتي
عشان كده قررت اخطفك وقررت أن الخبر يوصل للصحافه ولكل الناس
ه هروح فين
متقلقيش هوديكي مكان محدش يقدر يوصلك فيه
حطيت وشي بين ايديا وانا بعيط بوجع
انا مش قادره اصدق ان كل ده بيحصلي انا حاسه اني في حلم لا لا في كابوس انا في كابوس واكيد هفوق منه صح !
اتنهد تنهيده طويله وهو بيبصلي بشفقه
متزعليش نفسك انسانه جميله زيك متستحقش تعيش مع مجرم زي امجد صدقيني
عمري ما كنت اتخيل أن البني آدم الوحيد اللي حبيته وعملت كل حاجه عشانه يطلع بالبشاعه ديه!
المهم انك خرجتي من الموضوع ده سليمه
ضحكت
سليمه
علي الاقل جسديا علي الاقل عايشه يامدام جنا
طب وقلبي يا نادر وقلبي اللي اتكسر علاجه ايه
الرضا بقضاء ربنا
انا راضيه و والله يارب انا راضيه بقضاءك بس غصب عني غصب عني نفسي بتضعف وبلاقيني منهاره يارب خفف عني خفف علي قلبي الحمل وريحني يارب صبرني علي الابتلاء يارب
ان شاء الله هتكوني احسن صدمه وهتعدي زي اي حاجه عدت في حياتك
يارب ياااارب
نتحرك
علي فين
مكان بعيد عن هنا شويه
فين يعني
للاسف هو في وسط الصحراء
رديت بخوف
ص صحراء
المكان الوحيد اللي اقدر اكون متطمن وانتي موجوده فيه
ه هعيش لوحدي في الصحراء
لا طبعا ...في جماعه طيبين هيستقبلوكي وهتعيشي معاهم لحد ما نقدر نقبض علي امجد وكل العصابه ونتأكد انك مش في خطر ..وقتها هترجعي بيتك وحياتك من غير اي خوف
بصيتله وسكتت وعيوني مدمعه وجوايا الف سؤال لكن مش قادره انطق
مشكتش فيا ليه مع اني مراته !
ابتسم ابتسامه لطيفه وهو بيكمل سواقه
لان بني ادمه جميله زيك وفي رقتك وطيبه قلبك والحب اللي بتوزعيه علي كل اللي حواليكي استحاله تكون مجرمه
بصيت قدامي وانا برد بصوت مخنوق بالعياط
لكن للاسف وقعت مع واحد مجرم لابس وش ملايكه
تسمحيلي اقولك أن امجد مش ملاك ولا حاجه ..حتي معاملته مع الخدم ومع الناس في الشركه ومعاكي انتي شخصيا بتوضع قد ايه هو شخص بشع واناني
للاسف كنت ببررله كل تصرف عشان بحبه !
وكنتي بتيجي علي نفسك كتير عشان بتحبيه
هزيت راسي بتأكيد وانا بشهق وبحط ايدي علي بوقي وحاسه أن قلبي من
كتر الحزن هيقف
مسك ايدي تلقائيا وهو بيبصلي بشفقه
ميستاهلش دموعك ياجنا انتي ربنا بيحبك عشان كشفلك حقيقته قبل فوات الاوان احمدي ربنا انك بخير
رديت بهمس وانا بضغط علي أيده
الحمد لله يارب الحمد لله
سحب أيده من ايدي بأحراج وكمل سواقه وانا في عالم تاني عالم بفتكر فيه
