خطف بالأتفاق بقلم إيمان شلبي
هتحضر الحفله !
لا
رديت بحزن وكسره
ليه
عندي شغل كتير اليوم ده
عيوني لمعت بالدموع وانا ببصله بحزن اكبر
بس بس انا كنت عايزاك معايا اليوم ده يا امجد
رد بضيق
يوووووه بقي يا جنا انتي مبتزهقيش من الزن
رديت ودموعي علي خدي
زن!!
بقولك ايه انا مش فاضي لشغل العيال ده مش كل ما اكلمك كلمه تعيطي زي الاطفال دي بقت عيشه تقرف
قال كلامه وقام مشي من المكان وانا قاعده ببص لآثره بشرود وقلب مكسور
اعرفكم ده امجد جوزي متجوزين من حوالي خمس سنين اول سنه جواز كانت احلي واجمل واهدي سنه بالنسبالي كانت تشبه تلت سنين الخطوبه بل بالعكس كانت اجمل بكتير
كان شخص حنين لطيف متفاهم رومانسي
لكن بدأ الوضع يتغير بالتدريج لما الشغل زاد عليه في الشركه اللي ورثها عن باباه بدأت حياتنا تتشقلب ميه وتمنين درجه عشان يثبت أنه رجل اعمال ناجح وجدير بالثقة بدا يهمل فيا وحياتنا اتحولت لجحيم بالمعني الحرفي !
مكنتش بشوفه غير كل فين وفين وخاصه أنه بيسافر كتير جدا مبقاش يسأل عني ولا حتي بيحاول يعتذرلي عن تأثيره الشغل بقي مصدر سعادته وانا اتركنت علي الرف زي كوبايات النيش زي ما بنقول
بقالي اربع سنين علي الوضع ده كل يوم وكل دقيقه وكل ثانيه بحاول بأقصي جهدي عشان الجوازه تكمل لكن للاسف مفيش فايده
كتير جدا اتنازلت عن حقوقي كتير جدا اتغاضيت عن حاجات مينفعش اتغاضي عنها واولها اني ابقي ام
كتير كنت ببقي في عز ضعفي وخوفي ويأسي ومش بلاقي كلمه حلوه منه ولا حتي طبطبه علي قلبي المكسور
كتير كنت بنجح في شغلي وبحس بتقدير الناس ليا وحبهم وتشجيعهم لكن كل ده بالنسبالي مكانش ليه اي قيمه ولا كنت ببقي مبسوطه لأن التشجيع والفرحه مش جايه من اقرب الناس ليا
مبقتش بقدر اشاركه تفاصيل حياتي زي زمان
لكن في
حب اهتمام تقدير
كنت ونعمه الزوجه مع شخص مش بيقدم اي شئ يحسسني بقيمه نفسي
والنهارده بس أدركت اني كنت غلط
أدركت أن العطاء المفرط بيعلم الشخص اللي قدامك استنزافك كليا وكأنه حق مكتسب !
فوقت من شرودي علي صوت الخدامه اللي ظهرت فجأة قدامي
جنا هانم السواق والحارس الخاص بتاع حضرتك في انتظار حضرتك برا
حطيت فنجان القهوه علي السفره وقومت من مكاني وانا بحاول ارسم ابتسامه مزيفه علي وشي عشان محدش من الخدم يحس بحاجه
اول ما خرجت لقيت السواق واقف ومعاه الحارس الشخصي بتاعي ساندين علي العربيه
قربت منهم بابتسامه
صباح الخير
السواق وهو بيفتحلي باب العربيه باحترام
صباح النور يافندم
أما عن الحارس هزلي رأسه بابتسامه من غير ما ينطق حرف
العربيه اتحركت وانا بصيت من الشباك ورجعت لشرودي مره تانيه
السواق وهو بيبصلي من المرايه
حضرتك كويسه
ابتسمت بتوتر
ا أه الحمد لله
متأكده اصل باين علي حضرتك متضايقه النهارده
لا لا الحمد لله شكرا علي سؤالك
علي ايه بس ياهانم ده انتي خيرك علينا ربنا يفرحك يارب
رددت الكلمه وراه بأمل ورجاء
امين يارررب
صحيح الف مبروك لحضرتك علي الترقيه
الله يبارك فيك تسلم يارب
حضرتك تستاهلي كل خير
ربنا يخليك يارب يا عادل ده من ذوقك
كان حديث صغير داير ما بيني وبين السواق لكنه كان الطف واجمل حديث ممكن يمر علي مسامعي وخاصه وانا شايفه الصدق في دعواته وفرحته ليا
وصلنا قدام الشركه اللي بشتغل فيها وكنت لسه هدخل بس الحارس وقفني
جنا هانم ممكن لحظه
رديت باستغراب
في حاجه يا قاسم
قرب مني وكان في أيده بوكيه ورد كبير لونه احمر وملفوف بلون اسود
وفي الحقيقه معرفش
مدلي أيده بابتسامه لطيفه
اتفضلي
ابتسمت بأحراج
ده ليا !
اه
ا احم ش شكرا طبعا ب بس ممكن اعرف ايه المناسبه
حبيت ابارك لحضرتك انك اترقيتي في الشغل
عيوني لمعت بالدموع وانا باخده منه وبقوله بصوت مخنوق بالدموع
شكرا بجد ربنا يخليك
ابتسم وقالي برسميه
عن إذن حضرتك
قاسم
نعم يا هانم
هستناك علي الحفله النهارده
هز رأسه بهدوء
باذن الله هحاول
رديت برجاء
لا توعدني انك تحضر
اتنهد تنهيده طويله وبعدها هز رأسه بابتسامه
اوعدك حاضر
الساعه ٧ مساء
كنت واقفه قدام المرايه بضيف لمساتي الاخيره من الميك اب وبظبط طرحتي ولبسي للمره المليون بالتقريب!
اخدت نفس عميق لما خلصت نهائيا وانا ببص لاخر مره علي مظهري برضا تام
بالرغم اني رايحه حفله تكريم ليا علي مجهوداتي اللي قدمتها للشركه خلال العشر سنين اللي اشتغلت فيها إلا أني كان جوايا حزن العالم لعدم حضور امجد في يوم زي ده
حاولت معيطش لكن للاسف كل محاولاتي فشلت وعيطت غصب عني
في الحقيقه كان صعبان عليا نفسي اوي كنت حاسه اني مليش قيمه عند امجد
حسيت اني مجرد حاجه زي اي حاجه كان بيتمناها ولما نالها بدأ بالتدريج يمل وينفر منها ويتجدد شغفه وآماله نحيه شئ تاني افضل !
الباب اتفتح مره واحده علي آثره اتنفضت من الفزع
كنت مفكره أنه حد من الخدم ولسه هتعصب لقيته هو
قربت منه بلهفه وابتسامه واسعه
امجد
والغريبه أنه تخطاني وفضل يلف في الأوضه علي حاجه مش فاهمه ايه هي
امجد في ايه بتدور علي حاجه
لقيته بياخد ورق كان محطوط علي الكمود بلهفه وبيفتحه واول ما فتحه أتنهد براحه
الحمد لله
امجد انت ليه مش بترد عليا
اتعصب عليا
اسكتي بقي ياشيخه اخرررسي بسببك وبسبب نكدك نسيت ورق مهم واضطريت ارجع عشان اخده
بصيتله بصدمه ودموعي نزلت لا اراديا علي خدي ولاول مره في حياتي اخرج عن صمتي واضطر اتكلم
انت ايه يا اخي اييييه الجبروت ده ايه اللامبالاة دي ايه الانانيه ديه حرام عليك انت بتعمل فيا كده ليه اربع سنين بحالهم بحاول بكل جهدي اتأقلم واتحمل واتغاااضي عن حاجات مينفعش التغاضي فيها كل ده عشان بحبك وباقيه عليك باجي علي نفسي كتير عشان برضو بحبك بتحمل منك قسوه وقله اهتمام وقله تقدير كل ده بدافع الزفت الحب واقول بكره يتغير بكره يحس بيا بكره يراجع حساباته وانت ولا هنا انت بقيت كده ليه يا امجد
انت اتغيرت بالشكل ده ليه قولي فهمني انا وحشه انا بعمل تصرفات بتزعجك طيب طب زهقت مني طيب حبيت حد ومش طايقني معاك قولي فهمني متسبنيش بالشكل ده متعلقه في الهواء !
ربع أيده ورد ببرود
خلصتي
هزيت راسي بنفي وبنبره كلها وجع
للاسف مخلصتش ده جزء بسيط اوي من اللي جوايا
تمام يا جنا انا رايح الشركه وانتي روحي الحفله بتاعتك وبلاش شغل عيال اتمني لما ارجع بليل تكون حالتك اتحسنت وراجعتي انتي حساباتك
قال كلامه وخرج من الأوضه وانا واقفه بغلي وبجز علي أسناني بعنف
من غيظي والضغط اللي كان جوايا فضلت ادور علي حاجه اكسرها لحد ما وقعت عيني علي فازه وبدون تفكير وبكل غل مسكتها وهبدتها نحيه الباب
قعدت علي طرف السرير وحطيت وشي بين ايديا وفضلت أعيط بحرقه
اكتر حاجه بكرهها في نفسي اني بيبقي جوايا مليون سؤال ومليون رد فعل محضراهم لوقت المواجهه لكن وقت المواجهه الفعليه بكتفي بالعياط وبكام كلمه مش بيوجعوا اللي قدامي بالعكس دول بيوجعوني أنا اكتر من اي
شخص
الفون بتاعي رن برقم مدير الشغل بتاعي ...
مسحت دموعي
الو
انتي فين ياجنا اتأخرتي كده ليه
احم ا انا اسفه يافندم
