قصة مس رحاب ل احمد عاطف
بمناسبة الحوارات بتاعت الرسم ومها الصغير...حابب أحكى قصة أليمة أفتكرتها.
وأنا في إعدادى كنت مشهور في المدرسة كلها إنى بعرف أرسم .. المهم كان عندى مدرسة دراسات اجتماعية اسمها رحاب تقريبا..كانت زى مها هادية كده ومركبة على قلبها مراوح.
المهم أرحاب دى استغلتنى أسوأ استغلال...كانت بتدينى لوحة كبيرة بتاع مترين في متر وتقولىخد أرسملنا فيها خريطة العالم عشان هنعلق اللوحة دى في مكتب المدير...فأنا أروح البيت أفضل 4 أيام قاعد من بعد الغدا لحد 12 بليل عمال ارسم في الخريطة..و فالآخر ألاقى اللوحة متعلقة مكتوب تحتها تحت إشراف أ رحاب من غير إسمى.
مرة تانية تدينى لوحة أكبر وتقولى هترسم طلعت حرب وهنكتب جنبه كلمتين عشان نعلق اللوحة دى في الفصل ونبين شغل الدراسات الاجتماعية مينفعش بتوع العلوم يبقوا احسن مننا .. لا مينفعش طبعا يا أستاذة العلوم يبقوا أحسن وانتى على وش الدنيا.
ف أفضل يومين تانيين مسحول أنا ووالدتي هي مسكالى اللوحة الكبيرة عشان
متلفش
المهم الموضوع كان ماشى كده فترة طويلة...كل شوية رحاب دى تدبسنى في رسمة لوحة او نشاط لدرجة كرهتنى في الرسم...ومش بس ليها...لأ دى كانت بتجامل بيا أصحابها المدرسين في الفصول التانية وتخلينى أرسملهم لوحات كمان...وكنت مستحمل وعبيط وساكت.
لحد ما في يوم موضوع الاستغلال ده خد منحنى مختلف تماما...لقيتها فى يوم بتطلعلى من شنطتها صورة راجل بشنب مكشر وعنده 45 سنة مخدناهوش في الدراسات ولا التاريخ.... قولتلها هو مين ده يا مس!!...قاتلى ده جوزى...عيد ميلاده الأسبوع بعد الجاى وعايزاك ترسمه رسمة حلوة كده.
أنا طبعا اول ما قالتلى انه جوزها...قولت الحمد لله طبعا انه مطلعش شخصية تاريخية عشان مذاكروش أصل شكله صعب اوى...ثانيا قولت على جثة مدير المدرسة إنى ارسم جوزها ده... وخدت منها الصورة وانا مقرر
من جوايا
المهم رجعت البيت حطيت الصورة قدامى وقعدت أسرح في ملامح جوزها...أقسم بالله كل ملامحه ما تترسمش لا بالايد ولا بالرجل...حتى لو كنت عايز أرسمه....وشه ملوش شكل معين ...مكنتش هعرف.
فقعدت افكر في عذر أقولهولها...لحد ما قررت اقولها إن الصورة ضاعت منى وانا مروح من المدرسة...فتزعل بقى إنى مخلتش بالى من جوزها وضيعته والموضوع يتقفل نهائي.
لكن لما قولتلها كده لقيتها بكل هدوء مطلعالى صورة تانية ليه من شنطتها! هو فيه ايه بالظبط يا بنت ال ! ... ايه كل صوره اللى ماشية بيها دى! ... هو وائل جسار!!!
المهم خدت الصورة منها وانا هم الدنيا راكبنى...هعمل ايه فالورطة دى!..مهو انا مش هرسمه يعنى مش هرسمه!...وفضلت بقى كل ما تسألنى عالرسمة أقولها أعذار...اللى هو الكهربا قطعت وانا برسم...ماما كانت تعبانة وخدناها المستشفى امبارح...إلخ...وكل ما أقولها عذر تقولى ماشى لسة معانا وقت براحتك!
طب وبعدين
لقيتها بتقولى ياااااه للدرجادى باباك ومامتك مش سايبينك تشم نفسك!...وراحت فاتحة جدول الحصص وباصة فيه وقالتلى انتو عندكو النهاردة حصة ألعاب بعد الفسحة...انا هكلم مدرس الألعاب مينزلكش الملعب ويسيبك في أوضة المدرسين عندى ترسم الرسمة براحتك يلا ابسط يا عم
بس ... وأصحابى كلهم نزلوا حصة الألعاب يلعبوا ويعيشوا طفولتهم بينما أنا على الجانب الآخر عمال برسم فى شعر شنب جوز أبلة رحاب اللى قاعدة جنبى منجعصة بتشرب شاي وعمالة تعدل على الصنايعى بتاعها اللى هو أنا رفع حواجبه حبة يا أحمد ... صغر مناخيره شوية مكبرها ليه ..
أقسم بالله هي اللى كبيرة يا أستاذة رحاب..أنا مال أمى أنا !!!!!!
ف
بلاش حد
